Wednesday, 26 February 2020

SANJA'NA ZAINUR RAHMAN E RADAR MADURA (23 FEBRUARI 2020)

0

Sumber foto: muralsyourway

TORON SAMALEM

Bula se ampon ajar
arangka’ e buggigga bulan
ngalenglenge kottha Pamekasan, e jalan blumbungan
arassa cambur dhalem pangabasan
paddhang mesemma dika agaggaran
tagantong e seddi’na kembang sakura se atabuyan

Pello nyapcap ka ate
abarenge aeng terros ka leke
dhari langnge’ se ondhem, bula ngabas e jauna
akadiya darameyan se bula ban dika ngaop e babana

Bibirra se kembang, esangka malathe
langkong tombu e dhasar paste
abaris e penggirra kodhung se napang
aromasa karpet mera neng kabinan
se bula ban dika moji janji e pelaminan.

(Panglegur, 2020)
………………………………….

LOKA PORNAMA

Taresna se asapo’ e bibirra pornama
loka duli nyapcap dhalem sokma
akantha aba’ posang e leggana
ngabas mesem gaggar e jauna

Seggut tera’na damar nyo’on pangesto
bila angen ngalesser ta’ abakto
e dhalem settong kabadhaan
ate tennar lantaran etambuwi ojan

Tor-catoran kalaban pekkeran
nabang settong kapartajaan
agaja’ e ro’oma tana sakampong
polana rassa abit ta’ apolong.

(Panglegur, 2020)
………………………………….

NABANG LAJANGAN

Dhari penggir teggal
angen nyapa dhaun se gaggar
sopaja lengserra are
lekkas alombar ka dhalem ate

Karana lajangan
se alembay e bibirra ondhem
agabay nabang bula
sampe’ gaggar ojan e dhadha

Dhu guste...
amarga sokma nyellem
epaten kalaban senar se mesem
ngeba satongkop rassa
akadiya asapo’ e penggirra mata.

(Panglegur, 2020)
………………………………….

PARA’ MUALIK

Gi’ tettep e babana langnge
se ta’ tanggung robana
amarga bulan ngerrem e budhina
ra’-para’ mualik ngompos ka adha’na mata

Dika se jau
lantaran mesem gaggar ka bau
akantha loka nyapcap
aroba rassa ta’ gellem kessap

Ampon nyellem ka bara’ bume
paste jugan compet ka ate
pajalana akadiya janor apeltas
agabay taresna ekamellas.

(Panglegur, 2020)
………………………………….

NGOMBAR LOKA

Serrona kembang malathe
sabban are sake’ ta’ re-mare
enga’ dha’ ka oca’na
e bakto gapper nyangging e dhadhana

Mesem se agabay manes e bibirra
maske serro alangngoy e mata
bula sabbar, kor poko’ dika jembar
sanaossa ate arassa eobbar

Janjina ta’ adinaagina
coma oca’ se gaggar e bulan pornama
sake’ rassana tape eja-kaja
tasellem bula, sambi nekket dhadha

Bula ngarep bisa maloppa
mabaras ate se talebet maloka.

(Panglegur, 2020)
………………………………….

Zainur Rahman, laher e Prenduan, Songennep, 26 Maret 2000. Kalowaran MTs. Al-Manar Brungbung, Prenduan, tor MA 1 Annuqayah Lu’-Gulu’. Samangken daddi mahasiswa IAIN Madura.
Author Image
Aboutarsippenyairmadura.com

Soratemplates is a blogger resources site is a provider of high quality blogger template with premium looking layout and robust design

No comments:

Post a comment