Saturday, 4 January 2020

SANJA'NA AH. HASMIDI (RADAR MADURA, 28 DESEMBER 2019)

0

Sumber gambar: g/ pixabay.com
AREBA BULAN

E pamengkang
tombu jenno bungka tresna
eseram sabban are klaban ojan kasennengan

Mano’ nongko’ neng ranca’na bakto
dhaunna nyegga capcabba gumigil ondhem petteng
neng matana dika, ale’ gantongan ate
ojan laonan ngeba buru nemor kerrongnga

Dhalem mosem kapeng lema’
ta’ kera kajal teggal paneka
sabab bibit ampon etekkem sapergem
etabura bila malem tedhung
neng reba’anna bulan

Sabban lolos etorae tengka’
nyepak sossana badan manyolbu’ taresna saongguna

Songennep, 2019

ABÂLI MOLÈ

Orèng nèngtèng dhâghing neng bhâdhân dhibi’
èghibâ mole
samarèna arè onḍung neng jhâlân apanḍi ojhân

Ḍâlem karep bâkto tapongkor
dhika ngèbâ’ lesso

Orèng paḍâ acarèta abâ’na dhibi’
ngangghit ajhumanna bâkto
madḍhâi tarèkana ajâl èsolbhi’ ghân sakonè’

Apangrasa lebbhur senneng ètarèma sabbhân mella’
apangrasa lèbur atè mètong dhusa ghenna'

Ḍâri jhâlân nèka
tèngka’ kabitong jhânjhi
ponana ètaghi sabbhân mata
panyaksèna angèn nyeppa’ bun-embunan

Bhâdhân èpabâli samporna
tor ajâwâb pèntana carèta sè èkalampa

Songennep, 2019

doc/ arsippenyairmadura
AH. HASMIDI, toman nyantre e Pondhuk Al-Ishlah Monce’ Tengnga tor ajar e STKIP PGRI Sumenep. Salaen paneka ajar e LKSB Pangesto Net_Think Community Sumenep, ngabdi e SDK Sang Timur tor SMAN 1 Bluto.
Author Image
Aboutarsippenyairmadura.com

Soratemplates is a blogger resources site is a provider of high quality blogger template with premium looking layout and robust design

No comments:

Post a comment