Header Ads

Puisi-Puisi Lukman Hakim AG dalam Kumpulan Puisi "Cengkal Burung".

Perancang sampul; Marsus.
Ayat Taresna

monggu dha’ bula
dika kajunjung menangka pangeket sampan kakerrongan
amata yat-ayat taresna
ngaros songay-songay malorju’ tombuna binis
tape ta’ ngontap dhari pellok bibir bula

tanyengnga ora’ bula
ceccer e kennengngan tatemmona bula ban dika
se saleng pandeng, saleng sapa, saleng mesem
akakandha sajarna’ana
alabat toron tana, kaolemman sabungana

sajjegga bula nanggale sonar bulan robana dika
ban bula ngedhing sowara e-pae madduna
Daud e lessana
ate akarettek terro alabbusa e kaderressan tanges mempe
se abubungan sajagat akkal ban pekker

tae lala’ e pepe kanganna dika
nandha’agi tasydid-ghunnana kajembaran
se patot erenggane sadaja harkat salaen dhapen

Gappora, 2007


Palakat

ma, enga’ dha’ tokol, pa’a’, petthel, gargaji, jidal, sepat, centhong, kaloso’, salasar, ebbor, pathel, obing aracek obang. dhari bato, semmen, tattaen, bubuk, tana taba beddhi daddi lolo lena leca’ taba rola’. dhari soko soka’ sake seka’ seko erreng koko, osok, salodur, ata’na genteng taba asbis. adek labang potong candhila. dhari  salonjur perreng epoger togel daddi tongga’, patthok, carang, pangonco’an, carokcogan amata soca, aona’ adhadhar.

ma, odhi’ dhari egandhu’, rembi’, baji’, epagentang, abali’, napang, jaga, taju’, arangka’, agarsot, neteratengka’, ajalan, berka’, alorju’ daddi na’-kana’ lajang lanceng/paraban dibasa towa, kae-nyae, ju’-enju’, engkong agung. mon ta’ bajang econgngap pasthe asandhakep olo dhaja e lencak gadebbung bungkol apandhi babur ekaloskos tanges abareng guntenganna rambing tello lapes nojju dhingdhing are atora taccerra dhuwa’ acer onjur olona.

ma, mangkat dhari alip, ba’, ta’, tsa’ jim, ha’ etorop neng iya’ daddi oca’. Oca’ daddi okara. okara daddi paraggrap. bait dhakop sorat, berta, carpan, ganjaran, sanja’, novel, daddi bundu’na kacang e malem mingguwan. dhari petteha, qulhu, tahlil, sarwa, diba’, yasin, tobat etompo’ daddi pate: lo’-tello’, to’-petto’, pa’polo, nyatos, nyataon, nyaebu, etotop e holan. ta’ lopot ekasapo’ aba’ dibi’, samangken, dhaggi’, pagi’, otaba sakejja’ laggi’.

: emot ta’ bakal abit

Labbuwan, 15 Februari 2008


Cengkal Burung

na’-kana’ se agulur gi’ dullu
menta tenggar ba’ari’
abali ka gindhu’anna reng towa
ngeba sagundhung partobadan
saebu aksara ta’ aharkat
salaen papaten adhates kasra.

dhumalemmanna, agulung careta didinan settong pangka
ka pergi-pergi alampat dina gi’-gigi’na na’-kana’
alebun daddi tabun, abengko dhari kopeng mata
se topo, pengko, jugan dhari pekker se salekko.

pas bila obana buko, nyare, cengkang, kelan, ban dheppa
mon gi’ paggun ngokor omor, maske dhalemma anengke’an
dhari somor, banne se tanto.

gi’ epapagguna taretan amoso palotan
lencak acangga batton
otaba garebbil dhari tatepo

ma’ akkal aliyu’ bilu’ padhana bellu’
daddiya sodek padhana adek.

Labbuwan, 03 Juli 2008


Lukman Hakim AG, penyair berdarah Madura lahir di Sumatera. Alumnus Sekolah Tinggi Ilmu Tarbiyah Aqidah Usymuni (STITA) Sumenep. Cerpen dan puisi-puisinya baik yang berbahasa Madura atau Indonesia terbit di beberapa media massa dan terangkum dalam antologi bersama. Kini menjadi redaktur Jawa Pos Radar Madura (JPRM) pada rubrik budaya. Pernah menjadi anggota Komite Sastra Dewan Kesenian Jawa Timur (DKJT) 2008–2013. Menggagas Komunitas PELAR yang pada awalnya fokus pada kajian sastra Madura dan kemudian berkembang ke dunia teater. Sejak 2008 dia bergabung dengan Lembaga Kajian Seni Budaya PANGESTO Net_Think Community Sumenep asuhan Alfaizin Sanasren dan Language Theatre Indonesia. Buku puisi tunggalnya “Sagara Aeng Mata Ojan” dan “Cengkal Burung”.
Powered by Blogger.