Header Ads

Puisi-Puisi A. Hamzah Fansuri Basar di Radar Madura


Heart on Fire Abstract Mixed Media Painting on by TheVelvet Garage. Sumber : Abstract Painting.

Pèlog

sè kaalok pètto’ nyatana lèma’
sè ḍuwâ’ monyè sè mèrèng
sè mèrèng bânnè kèng ghilâ
sè ghilâ bânnè ta’ bârâs
sè ta’ bârâs panèka laras
sè laras panèka pâḍâ, anyama paḍḍhâ
sè paḍḍhâ ampon tanto longèt,

/Panongghul
ponapa sè nongghul ampon tanto sè ngajhul
sè ngajhul mestèna sè ngaḍâ’
sè ngajhul ka aḍâ’ antarana barang sareng ghulu
kapèng sèttong amonyè bem.

/Ghulu
ompama sè nongghul panèka sèra
sè kapèng ḍuwâ’ panèka ghulu
sè patot ta’ mestè sè dhullu
sè dhullu ta’ anyama ngaḍâ’,
manabi taḍâ’ è buḍiyânna.

/Ḍâḍâ
ḍâri ghulu ampet ka ḍâḍâ,
ḍâri dhullu katon ta’ paḍâ.
Dhinèng paḍḍhâ amonyè pèngpèlo’,
iyâ arèya bilâ sè katello’.

/Pèlog
sè kaalok tantona sè segghut èyolok
aghântong tanang ka ḍâḍâ,
dhinèng soko bâḍâ è lama’
sè nyolok antarana tello’ sareng lèma’
Panèka empa’ bânnè mama’.

/Lèma’
napa sè èkalama’ saellana empa’?
sèra sè ngakowa mama’ mon bânnè anḍi’na eppa’?
èngghi panèka bilâ sè kapèng lèma’.

/Nem
longghu è lama’ kantos ka malem,
orèng tama’ ponapa sè èkalènyem?
nem, nem…
bilâ saampona kapèng lèma’.

/Barang
lastarè nyorot toron ka sè bâbâ
sè bâbâ mestèna sè palèng mabâ
sè mabâ sokla ajhina
bhârâng ponjhul tèngghi.

ngèrèng pâḍâ mèreng ka sè mèrèng,
tatèngka sè nyalatho,
nyalèndhâ panèka ènḍhâ.

2016

 
Slèndro

Ponapa sè èsebhut swara asalla ḍâri monyè,
sè dhâddhi salbut manabi pagghi’ nyè-nganyè.
sè ta’ ghenna’ bânnè ta’ genna,
sè ghânjhil panèka junèl.

sambi mèrèng ngèrèng mèreng tor pèyarsa’aghi…

/barang
mon èbitong panèka sèttong,
para’ sèyang amonyè sè sarèyang.

ḍâri atè sè palèng ḍâlem tor mabâ.

sè anyaksè’è taḍâ’ pangèran nangèng Allah,
bân anyaksè’è jhâ’ saongghuna
Muhammad otosan Allah.

/ghulu
anḍi’ capèng kabâḍḍhâ dhuwâ’,
panèka monyè sè kapèng ḍuwâ’.

orèng pèlat jhâ’ bâghi ngakan kolat,
jhâ’ mancèlat manabi ghita’ ashalat.

/ḍâḍâ
ḍâri dhullu porron ollèna marḍâ,
ḍâri ghulu toron ka ḍâḍâ.
kèpèng cèlo’ kapèng tello’,
caca jhâ’ to’-malto’ ma’ ta’ bâḍâ kopèng ngalto’.
bârâ’ kiblat kaangghuy ngaḍhep shalat,
èyatorè azâkat ampon karè èkanèyat.

/lèma’
lèma’ amonyè empa’
lama’ ampar pasèpa’.

bilâ tasè’ tanto bhernèng,
salebbârrâ terro èsassa’a.
bâḍâ nasè’ sareng aèng,
èḍhâ’ârrâ karè apoasa’a.

/nem
sè kèng-bingkèng panèka lèma’,
sè asèkep bingkèng orèng tama’.

mangkat ajjhi ka tana soccè,
jhâ’ maajhi mon pagghi’ calèkkè.

sè ghânjhil lèma’ panèka rokon islam.
alif lam mim…
orèng islam èsambhât moslèm.

2016


Kèjhungan Tèḍung

/Ḍung-tèḍung ana’ jâludin.
sè taḍâ’ obu’ asotapa tèḍung
ḍâri tabu’ taḍâ’ nabu’, nondhung abâ’na dhibi’.

ènga’a bâ’na kacong bân cebbhing.

embu’ sè nganḍung ngakan kaḍungḍung,
ḍhu sojjhin malatè.
ta’ kèra onḍung mon ta’ kaḍung,
ḍhu sè raddhin ngapotè.

/Mon ta’ tèḍung èjhâmo’anna.
akaroḍung, bhing, akaroḍung…
akaroḍung ma’ ta’ nganḍung.
totopè jârèya sè paḍâna kelmo’,
sè akèmo’ jârèya bânnè mo’-amo’.

akèmo’, cong, sambi makomo’
jhâ’ marongo’, cong, jhâ’ maèmo’.

buwâna ghâgghâr karè bighina,
èntar ka langghâr asongko’ ajjhi.
ngajhi è langghâr tèngghi ajhina,
pagghi’ dhâddhi paghâr abâ’ èsajhi.

/Jhâmo napè jhâmo temmo.
temmo bhâkal, bhâkal matè.
matè akkal, oḍi’ semmo.
jhâ’ kal-cengkal ḍâ’ Sè Ghustè,
maskè apokal pastè ètemmo.

ḍâ’ ka kacong bân cebbhing sanḍârân atè.

mokka’ tambhâ’ è ghir sèrèng,
ma’ ta’ kerrèng dhâddhi tapay.
ajjhâ’ nambhâ’ ghilina aèng,
mon dhâddhiyâ aèng, aèng è penay.

/Lambân napè jhârângo bâng potè.
jhâ’ nyamana lombung bânnya’ lèntè,
cè’ nyamanna rebbhung kella pathè.
ḍhu èmanna nganḍung parabân sontè,
ḍhu èmanna ètonḍhung ngambâ’ patè.

cong, bhing…
pathèna tèḍung nganḍung patè,
ḍâri tabu’, abâli bâ’na ka sotapa.

tètè potè pangastètè sabâb orèng bâng-sèbâng
pastè matè.

2016


Artatè Sasèbâ’

ngèrèng trètan paḍâ ngaèmodhi,
abâ’ kèsa mara cèthak gherrâng,
palappana kencor jhâi,
accènna mara poro,
èsosso’a abu tomanngnga,
èghâbây bâs-abâsân,
mèla jâgâ ongghu,
mara acan sakalasa,
bâu nyengnga’ taḍâ’ kennèng andhingaghi,
pangaterro sasèbâ’.

2016

A Hamzah Fansuri Basar, peminat sastra dan budaya Madura. Lahir di Pamekasan, 25 Maret 1985. Alumnus Fakultas Bahasa dan Seni, Jurusan Sendratasik (Seni Drama, Tari dan Musik), UNESA dan Sekolah Pascasarjana UGM Yogyakarta, Program Studi Pengkajian Seni Pertunjukan dan Seni Rupa. Karyanya pernah dipublikasi di Tabloid GEMA (UNESA), Jurnal Seni dan Sastra (FBS, UNESA), Majalah GONG (Tikar), Samarinda Pos, Radar Madura (Jawapos Group). Majalah Jokotole (Balai Bahasa Jatim), beberapa antologi puisi bersama; Pamekasan di Mata Penyair (Dewan Kesenian Pamekasan, 2007), Pengantin Taman Sare (Bawah Pohon Publshing, 2010), Antologi Puisi dan Cerpen Festival Trowulan (DK-Mojokerto, 2010), OTO-PUISI (Rumah Lembah, 2012), Ibu Nusantara Ayah Semesta (Gramedia, 2013). Dewan Redaksi Buletin Pakem Maddhu (Yayasan Pakem Maddhu, pelestarian, pengembangan bahasa dan budaya Madura). Mengajar seni budaya di SMAN 1 Sumenep. Alamat: Jl. Pintu Gerbang 84 A, Pamekasan. RT. 03, RW. 08, Bugih, Pamekasan. Domisili: Jl. Waringin, 5B, Bluto, Sumenep.

Powered by Blogger.