 |
| Lukisan diambil dari google. |
LALAMPAN REYAJA
/I/
Kanjeng Guste mareksane
kadaddiyan epon duwa’ kabula
se ta’ tako’ manggi’i pate
Pangarep nyo’on panganggap Kanjeng Guste
pasra ta’ poron se ngabakte
E naleka Ibrahim narema pakon lebat mempe
sareng Bu’ Hajar epapaste
nyamballiya na’ poto se paleng ngodha
Ismail asmana se parjuga
Ibrahim, Ibrahim
gu-onggu iklas se ngabakte
Ate-gante Iblis se datang—aguda
kalaban ca’-oca’ se manespa
tape paggaliyan se la barse
ta’ makendur serretta talena ate se socce
Kalaban sorban salerana Ismail etotop
epanyandhar ka bato
panggaliyanna Ibrahim arassa ta’ mangga
naleka e angka’ ladding kalaban astana
se ampon egangse ka tajamma kembang pangestona
“duh, aba
manabi neka lerres
parenta
paridha’ ajunan ja’
pakasta
segi’agi ka le’er abdina
ta’ kera nyengla
paggun narema
e ajunane-pon Allah
abdina pasra”
/II/
Duh, Kanjeng Guste
Dzat se Agung, lamba’-ballasa gantongan aba’
pangarep nyo’on panganggap
noro’a abdina dha’ lalampana
kaangguy jimatta abdina
pagi’ e pangadilanna Ajunan se Maha Samporna
Bulan Takepe’, 1438 H.
NYALASE
:monggu dha’ eppa’, pangeran kathon
Ajalan ka
koburan asango pandan
ban
kembang babur
nyapotta
jasad reng seppo
se ampon
bubar dulluan
Kalaban
fateha-sorat yasin
samoga
eparo’om serdaman
epatera’a
lobang se cope’
e dhalam
tana pamoleyan
Bila emot
gi’ badha sowargana
aromasa
kasta ta’ atoro’ papakonna
Darres
tangessa ate, rassa nespa ekakalong
padhana
mano’ se nanges e dhalem korong
nalpe’,
agallu’ ka maesan se settong
Duh,
ngarep onggu robana ngombar
akadi
bintang pajjar, maske sakeddap
masamporna
ka pangabasan
Bulan Takepe’, 1438 H.
NAMOY
E are tellasan
senneng tadha’ padha
ngabas oreng pak-rampakan
dhari jauna ba’-koba’an
Labanga bangko ebukka’
korse ban meja possa’
kalaban jajan se ganna’
Ngabas ka lowar bala tatangga padha sabbar
pamesemma tera’ majambar
maelang pekker se sossa
makompola taretan se abit apesa
Bila teba tamoy se asomaja
tanang galiya’ se nyandagga
Tong-settong padha asalaman
patoju’na segek padha nyaman
Andap asor salam pamanggina
ngabidi kandha macem barnana
masamporna sarat odi’na
mandar ekaolleya kabarkaddanna.
Bulan Takepe’, 1438 H.
Maniro
AF, lahir di Pesisir, Pasongsongan, Sumenep.
Pernah nyantri di PP. Annuqayah Latee. Bersama kawan-kawannya mendirikan Lesehan
Sastra Annuqayah (LSA) dan pernah bergiat di Bengkel Puisi Annuqayah (BPA).
Menulis puisi dan esai. Karya-karyanya terbit di media lokal dan nasional, juga
terkumpul dalam beberapa kumpulan antologi. Kini mukim di Yogyakarta untuk
menyelesaikan studinya di UIN Sunan Kalijaga, Yogyakarta. 
Tidak ada komentar:
Posting Komentar